HEADLINE
- October 5, 2026
- 02:16 PM
MJDAK no APFTL) realiza semináriu nasionál hodi fó sai ba públiku kona-ba selesaun no eleisaun ba M-PFN) ba períodu da-VI. Foto/Arminda Fonseca.
DILI, 05 Outubru 2026 (TATOLI) – Ministériu Juventude Desportu, Arte no Kultura (MJDAK) hamutuk ho Alumi Parlamentu Foinsa'e Timor-Leste (APFTL) realiza semináriu nasionál hodi fó sai ba públiku kona-ba selesaun no eleisaun ba Membru Parlamentu Foinsa'e Nian (M-PFN) ba períodu da-VI (2027-2029), ne'ebé sei realiza iha semana oin.
Ministru Juventude, Desportu, Arte no Kultura, Nelyo Isaac Sarmento, hatete semináriu ida-ne'e importante tebes, tanba daudaun tama ona ba períodu daneen kona-ba rekrutamentu ba Membru Parlamentu Foinsa'e Nasionál Nian.
Ministru Juventude, Desportu, Arte no Kultura, Nelyo Isaac Sarmento. Foto/Arminda Fonseca.
"Programa ida ne'ebé ita prepara joven sira ba lideransa ka parte ida oinsá mak joven sira iha kapasidade atu sira bele sai líder ne'ebé preparadu, bele sai lider jerasaun futuru nasaun nian. Ne'e hanesan oportunidade ita prepra ho kondisaun natoon hodi sira bele hatene lala'ok polítika, administrasaun ne'ebé ita-nia nasaun ne'e adota", Nelyo Isaac hatete.
Nia subliña katak Timor-Leste daudaun tama ona membru ASEAN, ida-ne'e oportunidade di'ak tebes ba joven sira atu kapasita sira-nia an, nune'e bele kompete ba dezenvolvimentu nasaun nian iha futuru.
Tuir governante, rekrutamentu ne'e la'o sai automatikamente ba Parlamentu Foinsa'e, maibe sei liuhusi prosesu lubuk ida. Tinan ne'e sei rekruta joven 142, ne'ebé reprezenta kada postu administrativu sira hothotu no reprezentante feto ida no mane ida, inklui ema ho defisiensia.
"Ha'u espera katak rekrutamentu ne'e la'o di'ak no joven sira bele aproveita oportunidade ne'e ho di'ak, tanba ida-ne'e programa adisionál ministériu nia." Kada tinan sempre prevee orsamentu", nia dehan.
Prezidente APFTL, Benvinda Gusmão Alves, hatete husi workshop nasionál ne'e signifika atu fahe informasaun ba públiku no ekipa sira ne'ebé responsavel sei organiza programa selesaun no eleisaun M-PFN iha kada postu administrativu sira.
Nia esplika katak ekipa sira ne'ebé ohin partisipa iha semináriu ne'e mai husi membru APFTL, Sentru Juventude, no pontu vokál MJDAK ninian ne'ebé destaka iha postu administrative sira, atu esplika ba sira kona-ba lala'o programa, nia benefísiu no mekanizmu sira ba kampaña, eleisaun, to'o ikus hetan joven na'in-rua.
Prezidente APFTL, Benvinda Gusmão Alves. Foto/Arminda Fonseca.
Depoizde semináriu, sei kontinua ba disemina kona-ba programa ne'e iha postu administrativu hothotu ne'ebé hahú husi 12 to'o 16 Outubru 2026.
"Husu ba joven sira ne'ebé hakarak hatene informasaun klaru hahú semana oin bele bá vizita ita-nia postu administrativu sira, no sentru juventude iha kada postu administrativu sira, tanba iha ne'ebá sei sosializa no sei loke rejistu ba joven sira, bele foti formuláriu prienxe no hatama", nia dehan.
Bainhira rejista hotu ekipa sei halo avaliasaun ba dokumentu no rezultadu sé maka liu sei fó sai iha loron 10 Novembru 2026, hodi hakat ba kampaña no eleisaun ne'ebé sei realiza iha loron 17 Novembru 2026. A ida-ne'e akontese loron ida de'it iha postu administrativu hothotu no husi ne'e mak sei determina joven sé mak sai membru Parlamentu Foinsa'e, no simu pose iha Dezembru 2026. "Bainhira simu ona pose, tinan oin mak kontinua formasaun no kapasitasaun ba sira", nia informa.
Orsamentu ne'ebé APFTL hetan husi MJDAK ba atividade ne'e hamutuk rihun $140-resin.
Jornalista: Arminda Fonseca
Editora: Maria Auxiliadora
Publisidade
Share
